Жорий йил 22 май куни Наманганда 61-Халқаро гуллар фестивали бошланди.

15 кун давом этадиган анъанавий байрамда Хитой, Япония, Корея, Туркия, Россия, Ҳиндистон каби хорижий мамлакатлардан келган меҳмонлар ва журналистлар иштирок этмоқда.

Мазкур типдаги халқаро тадбирлар ўз-ўзидан бюджетдан катта маблағларни талаб қилади.

Жумладан, Ҳукуматнинг 2022 йил 2 февралдаги қарорига мувофиқ “Халқаро гуллар байрами фестивали”ни молиялаштириш маҳаллий бюджет маблағларидан қопланади.

Мазкур тадбир учун вилоят ҳокимлиги 1 млрд 78 млн сўм, Наманган шаҳар ҳокимлиги эса 200 млн сўм ажратган.

Жумладан, Наманганда 22 май – 5 июнь кунлари халқаро “Гуллар фестивали”нинг 61 йиллигини юқори савияда ўтказиш мақсадида, вилоят мусиқали драма театри саҳнасида Рус миллий драма театрининг спектакль тамошаларини ташкил этиш ва Ўзбекистон Миллий симфоник оркестрининг ҳамда Рус миллий драма театрининг ижодий ва техник жамоасини кутиб олиш харажатлари ва бошқа харажатлар учун вилоятнинг вилоят бюджети захира жамғармаси маблағлари ҳисобидан Наманган вилоят маданият бошқармасига 364,5 миллион сўм маблағ ажратилган.

Шунингдек, мазкур тадбирни юқори савияда ўтказиш билан боғлиқ харажатлар учун вилоятнинг вилоят бюджети захира жамғармаси маблағлари ҳисобидан Наманган шаҳар маҳаллий бюджетига 714 млн 547 минг сўм маблағ ажратилган.

Бундан ташқари жорий йил 18 май санасида имзоланган Наманган шаҳар ҳокимининг тегишли қарори билан шаҳар марказий кўча, хиёбонлар ҳамда “З.М.Бобур” номли маданият ва истироҳат боғи ҳудудида кенг кўламда ободонлаштириш, кўкаламзорлаштириш, байрамона безатиш ҳамда замонавий шаҳарсозлик талаблари асосида ташқи ёритиш иллюминацион тармоқларини тортиш ва ўрнатиш билан боғлиқ харажатлар учун шаҳар маҳаллий бюджетининг 2022 йил захира жамғармаси ҳисобидан 200 миллион сўм маблағлар шаҳар ободонлаштириш бошқармасига ажратилган.

Гарчи Ҳукумат қарори билан ушбу тадбирнинг молиявий манбаси “маҳаллий бюджет маблағлари” эканлиги кўрсатиб ўтилган бўлса-да, вилоят ҳокими Ш. Абдураззоқовнинг 11 апрелдаги қарорига кўра, фестивалга тайёргарлик кўришга Наманган вилояти маҳаллий бюджетининг қўшимча манбаларидан ташқари, юридик ва жисмоний шахсларнинг ҳомийлик хайриялари ва қонун ҳужжатларида тақиқланмаган бошқа манбалар ҳам жалб қилинади.

Бу эса ўз навбатида тадбирларга сарфланаётган пулларнинг сарфланиши юзасидан ўтказиладиган назорат шаффофлигига путур еткизади.

Шунингдек, фестивал доирасида ўтказиладиган кўрик-танлов ғолиблари тегишли тартибда диплом, ҳайкалча ва қуйидаги совғалар билан тақдирланади:

Олий ўрин (2 нафар) – автомобиль;

1-ўрин (2 нафар) – қимматбаҳо совғалар;

2-ўрин (2 нафар) – қимматбаҳо совғалар;

3-ўрин (2 нафар) –  қимматбаҳо совғалар:

“Қадимий сулола давомчиси” – қимматбаҳо совғалар;

“Янги гул нави яратган гулчи” – қимматбаҳо совғалар;

“Энг ёш гулчи” – қимматбаҳо совғалар;

“Энг яхши гул композицияси” – қимматбаҳо совғалар;

“Энг яхши гулчи мактаби гулчиси” – қимматбаҳо совғалар;

“Энг кўп гул етиштирган гулчи” – қимматбаҳо совғалар;

“Гул парадида энг яхши безатилган автомашина” – қимматбаҳо 

совғалар.

Шунингдек, тақдирлаш маросимида молиявий ҳолатдан келиб чиқиб, ғолиблар сони ва совғалар миқдорига ўзгартиришлар киритилиши мумкинлиги ҳам истисно қилинмаган.

Ташкилотчилар, ижодий уюшмалар, жамғармалар ва бошқа ташкилотлар ҳайъат аъзолари ва мухлислар эътирофига сазовор бўлган гулчиларни тақдирлаш учун мустақил равишда махсус мукофотлар таъсис этишлари мумкин.

Шунингдек, тадбир доирасида кўрсатиладиган (сарфланган пулларни расмийлаштиришнинг имкони бўлмаган) хизматлар қуйидагича:

– фестивал доирасида тадбир бўлиб ўтаётган ҳудудлардан ўтувчи автомобил йўллари Вилоят ички ишлар бошқармаси йўл ҳаракати хавфсизлиги бошқармаси томонидан транспорт воситалари учун ёпилган ва бу ҳақда огоҳдантирувчи йўл белгиларини ўрнатилган.

– вилоят мудофаага кўмаклашувчи “Ватанпарвар” ташкилоти ҳамда вилоятдаги корхона, ташкилот ва бошқармалар фестивал доирасида Наманган шаҳрининг асосий кўчаларида махсус гуллар билан безатилган 150 та автомашиналаридан иборат “Байрам паради”ни ташкил этишлари керак.

Эслатиб ўтамиз, аввалроқ Сурхондарёда ўтказилган “Бойсун баҳори” фестивалига сарфланган маблағлар юзасидан материал эълон қилинган эди.

• Давлат бюджети
• Гуллар фестивали
• Наманган