5 йилдан бери халқаро қидирувда бўлган 34 ёшли аёл Ўзбекистон Ички ишлар вазирлиги Тезкор-қидирув департаменти ҳамда Туркиянинг Истанбул шаҳридаги Бош консулхонаси ҳамкорлигидаги қидирув тадбирлари натижасида қўлга олинди ва Туркиядан Ўзбекистонга экстрадиция қилинди.

Тергов ҳужжатларига кўра, ушбу аёл юқори маош ваъдаси билан қизларни алдаб Туркияга олиб борган, у ерда эса уларнинг фуқаролик паспортларини тортиб олиб, фоҳишалик билан шуғулланишга мажбурлаган.

1991 йилда туғилган ушбу шахсга нисбатан Ўзбекистон Республикаси Жиноят кодексининг 135-моддаси 2-қисми билан жиноят иши қўзғатилиб, қидирув эълон қилинган, олиб борилган тезкор чоралар натижасида унинг Истанбул шаҳрида яшириниб юрганлиги аниқланган.

Мазкур шахс Туркия ҳудудида қўлга олиниб, жорий йилнинг 18 ноябрь куни белгиланган тартибда Ўзбекистонга экстрадиция қилинди.

Амалдаги қонунчиликка мувофиқ, бундай жиноят учун 5 йилдан 15 йилгача озодликдан маҳрум қилиш жазоси белгиланган.

• Жиноят
• Одам савдоси
• Ўзбекистон
• Туркия