New Atlas нашрининг хабарига кўра, Австралиянинг Флиндерс университети олимлари тунда оғир кўрпа ёпиниб ётганда, у организмга қандай фойда бериши аниқланган. Оғир кўрпа уйқу сифатини яхшилайди, кайфиятни кўтаради, уйқу дориларидан воз кечишга ёрдам беради.

Олимлар тадқиқотни қуйидагича ўтказишган.

Тадқиқотчилар гуруҳи турли касалликларга чалинган барча ёш тоифасидаги одамларда уйқуни даволаш усули сифатида оғирлаштирилган кўрпалардан фойдаланиш бўйича 18 та тадқиқотни таҳлил қилди.

Уларда бутун материал бўйлаб бир текис тақсимланган пластмасса, шиша ёки металл доначалар билан тўлдирилган катта ўлчамли ёпинчиқлардан фойдаланилган. Бундай кўрпанинг танага берган босими қучоқлаш ҳиссини ҳосил қилади, бу эса танани бўшаштириш ва хавотирни камайтиришга ёрдам беради.

Оғир кўрпа остида ухлаган катталар яхшироқ уйқуга кетишгани ва ўзларини тетикроқ ҳис қилишганини айтди. Улар уйқусизликка қарши дориларга камроқ эҳтиёж сезган ва оғриқлардан камроқ шикоят қилган. Болалар учун эса натижалар ҳар хил.

Баъзи ҳолларда оғирлаштирилган кўрпалар диққат етишмовчилиги ва гиперфаоллик синдроми ёки аутизм спектри бузилишлари бўлган болаларда уйқу сифатининг маълум даражада яхшиланишини таъминлаган.

Бироқ бошқа тадқиқотлар шундай кўрпаларнинг болалар кундалик фаолиятига ижобий таъсирини аниқлаган. Тадқиқот натижалари тиббиёт амалиётида, айниқса руҳий саломатлик соҳасида, оғир кўрпалардан фойдаланиш бўйича йўриқномаларни ишлаб чиқиш учун асос бўлиб хизмат қилиши кутилмоқда.

• Фойдали
• қизиқарли
• тадқиқот