Олий Мажлис Сенати аъзоси, Ўзбекистон Ёзувчилар уюшмаси Фарғона вилояти бўлими раҳбари Энахон Сиддиқова узоқ муддат давом этган оғир хасталикдан сўнг вафот этди.

Қайд этилишича, марҳуманинг жанозаси бугун, 14 январь куни соат 14:00 да унинг хонадонида, Фарғона туманидаги Водил қишлоғи Саноат МФЙда ўтказилади.

Энахон Сиддиқова 1954 йил 28 августда Олтиариқ туманида туғилган, таълим, матбуот ва ижод соҳаларида турли вазифаларда фаолият олиб борган. Узоқ йиллик самарали меҳнат фаолияти даврида жамиятда ижтимоий-маънавий муҳитни соғломлаштиришда фаол иштирок этиб келган. Фидокорона меҳнатларининг эътирофи сифатида “Дўстлик”, “Эл-юрт ҳурмати” орденлари билан мукофотланган. 2015 йилдан шу кунга қадар Олий Мажлис Сенати аъзоси эди.

Ўзбекистон аҳли “Ўзбекистон халқ шоири” юксак унвони билан тақдирланган Энахон Сиддиқовани ўзбек адабиётида ўз ўрнига эга истеъдодли шоира, Фарғона адабиётининг забардаст вакиласи, жонкуяр жамоат арбоби сифатида яхши билади ва юксак қадрлайди.

Xabardor.uz марҳуманинг оила аъзолари ва яқинларига чуқур таъзия изҳор этади.

• Фарғона
• O'lim
• Сенат
• Senator