Фарғона ва Андижон вилоятларида фуқароларни ноқонуний равишда Умра зиёратига юборишни ваъда қилиб, улардан жами 6 900 АҚШ доллари талаб қилган шахслар ушланди. Бу ҳақда Давлат хавфсизлик хизмати хабар берди.

Маълум қилинишича, Фарғона шаҳрида фаолият юритувчи сайёҳлик фирмасининг норасмий ходими тегишли рухсатномага эга бўлмаган ҳолда икки нафар фуқарони Саудия Арабистонига Умра зиёратига юбориш эвазига 2 500 доллар талаб қилган. У 2 450 долларни олаётган вақтида ашёвий далиллар билан қўлга олинган.

Шунга ўхшаш ҳолат Андижон вилоятининг Шаҳрихон туманида ҳам аниқланган. Ноқонуний фаолият юритган туристик фирма ходими тўрт нафар фуқарони Умра сафарига юбориш учун 4 400 доллар талаб қилган. У отаси билан биргаликда 4 300 долларни олаётган вақтида ДХХ вилоят бошқармаси ва ИИБ ходимлари томонидан ушланган.

Фарғона шаҳридаги ҳолат юзасидан жиноят иши қўзғатилиб, тергов ҳаракатлари бошланган. Андижон вилоятидаги ҳолат бўйича эса терговга қадар текширув олиб борилмоқда.

Эслатиб ўтамиз, аввалроқ Самарқанд ва Гулистон шаҳарларида фуқароларни ноқонуний равишда Умра зиёратига юборишни ваъда қилиб, улардан 6 995 доллар олган икки шахс ҳам қўлга олинган эди.