“Cotton Campaign” халқаро коалицияси ўзбек пахтасини глобал бойкот қилиш чақириғи тугаганини эълон қилди.

Бу ҳақда жорий йил 10 март куни Одам савдосига ва мажбурий меҳнатга қарши курашиш миллий комиссияси вакиллари ҳамда “Cotton campaign” халқаро коалицияси делегацияси аъзолари иштирокида Ўзбекистон пахтачилик соҳасида яратилган меҳнат шароитларига бағишланган пресс-брифингда маълум қилинди.

Олий Мажлис Сенати Раиси Танзила Нарбаева ҳозирда меҳнат қонунчилигида халқаро стандартларни жорий этиш, мажбурий меҳнатга қарши курашишнинг институционал асосларини ривожлантириш бўйича олиб борилган ишлар натижасида Ўзбекистонда тизимли мажбурий меҳнат ва болалар меҳнатига тўлиқ барҳам берилганини таъкидлади.

“Биз ҳукуматнинг мажбурий меҳнатга барҳам бериш ва Ўзбекистон пахта секторини ислоҳ қилиш учун зарур бўлган ислоҳотларни таклиф қилишда ва амалга оширишдаги етакчилигини юқори баҳолаймиз. Сўнгги йилларда Ўзбекистон томонидан эришилган натижалар “Cotton Campaign” халқаро коалицияси томонидан ўзбек пахтасига нисбатан эълон қилинган бойкотни олиб ташлаш учун асос бўлди”, – дейди “Cotton Campaign” таъсисчиларидан бири Беннет Фриман. .

Таъкидланишича, Ўзбек пахтасидан бойкотнинг олиб ташланиши биринчи навбатда текстил саноатида дунёдаги етакчи корхоналарнинг Ўзбекистон бозорига кириб келишига имкон яратади.

Шунингдек, ушбу эътироф мамлакатда миллионлаб одамларга янги иш ўринларини яратишга, қишлоқ хўжалиги соҳасида халқаро стандартларни жорий этишга, тўқимачилик маҳсулотларининг экспорт ҳажмини оширишга ҳамда соҳада халқаро ҳамкорликни янада ривожлантиришга хизмат қилиши қайд этилди.

• Ўзбекистон
• Пахта
• boykot