“Ўзбекистон Республикаси Миллий инвестиция жамғармаси” АЖ (UzNIF) тарихда илк бор ўз акцияларини Лондон ва Тошкент фонд биржаларида оммавий савдога чиқарди.

 IPO орқали мамлакат иқтисодиётига қарийб 604 миллион АҚШ доллари жалб қилинди. Жамғарманинг умумий бозор қиймати эса 1,95 миллиард долларга баҳоланмоқда.

Эндиликда оддий фуқаролардан тортиб йирик халқаро инвестиция фондларигача Ўзбекистон давлат активларига сармоя киритиш имкониятига эга бўлди. Маҳаллий инвесторлар учун акция нархи 4,65 доллар этиб белгиланди, жисмоний шахсларга эса қўшимча 5 фоизлик чегирма тақдим этилди.

“BlackRock”, “Franklin Resources” ва “Redwheel” каби дунёнинг йирик инвестиция фондлари лойиҳага инвестор сифатида қўшилгани Ўзбекистонга халқаро ишонч ортиб бораётганини кўрсатмоқда.

Бу нафақат акциялар савдоси, балки Ўзбекистон иқтисодиётининг очиқлиги, шаффофлиги ва жаҳон молия бозорларига фаол кириб бораётганининг муҳим кўрсаткичидир.