Бугун, 1 июль куни футбол бўйича Жаҳон чемпионатида тарихда илк бор иштирок этган Ўзбекистон миллий терма жамоаси юртимизга қайтиб келди. Пойтахтдаги Тошкент халқаро аэропортида футболчиларни тантанали кутиб олиш маросими бўлиб ўтди. Маросимда сўзга чиққан Ўзбекистон Бош вазири Абдулла Арипов футболчиларни тарихий натижа билан табриклаб, уларни танқид қилаётганларга эътибор бермасликка чақирди. “Омадсиз футболчилар, диван экспертлари кўп бўлади. Уларни кечириб юборинглар.

Шуни унутмангки, бугунги авлоднинг жасорати келгуси авлодлар учун мустаҳкам пойдевор бўлади. Янги ғалабалар, янада юксак марралар сари олға!”, — деди Абдулла Арипов. Шунингдек, Ўзбекистон миллий терма жамоаси сардори Элдор Шомуродов турнир давомида жамоани қўллаб-қувватлаган барча мухлисларга миннатдорлик билдирди.

“Аввало, шундай натижага қарамай, бизни қўллаб-қувватлаган барча мухлисларга раҳмат айтаман. Америкада ҳам, Ўзбекистонда ҳам бизни қўллаб-қувватлаб турган барчага миннатдормиз”, — деди Шомуродов. Жамоа сардорининг таъкидлашича, мундиалдаги иштирок натижадан қатъи назар, Ўзбекистон футболи учун муҳим тарихий ютуқ бўлди. “Барча футболчилар майдонда борини берди. Натижа биз кутгандек бўлмади, аммо бу орқали бутун Ўзбекистонни бирлаштира олдик. Менимча, бу билан фахрланишимиз керак. Албатта, натижа учун мухлислардан узр сўраймиз”, — деди Элдор Шомуродов.