FIFA World Cup–2026 доирасида Ўзбекистонни халқаро майдонда танитишга қаратилган ахборот кампанияси 1,07 миллиарддан ортиқ кўришни қайд этди. Бу ҳақда Туризм қўмитаси халқаро ОАВ, ижтимоий тармоқлар ва интернет қидирувлари таҳлили асосида маълум қилди. Қайд этилишича, Ўзбекистон миллий терма жамоаси иштирок этган учрашувлар давомида мамлакат ҳақидаги хабарлар жаҳон оммавий ахборот воситаларида сезиларли даражада кўпайган.

Шу билан бирга, интернет фойдаланувчиларининг Ўзбекистон бўйича қидирув фаоллиги ҳам кескин ошган. Энг юқори ўсиш Колумбия ва Португалия терма жамоаларига қарши ўйинлар вақтида кузатилган. Google Trends маълумотларига кўра, сўнгги ҳафталарда “Узбекистан Colombia World Cup 2026” қидирув сўрови 450 фоизга, “Узбекистан” сўровига қизиқиш 40 фоизга, “Тоурисм to Uzbekistan” мавзусидаги изланишлар эса 10 фоизга ошган.

Кампания давомида Ўзбекистон ҳақидаги материаллар дунёнинг 3 мингдан ортиқ оммавий ахборот воситалари ва ахборот платформаларида эълон қилиниб, фойдаланувчилар билан 52 миллиондан ортиқ ўзаро мулоқот қайд этилди. Хабарлар BBC, ЭСПН, The Guardian, Fox News, Daily Mail, НДТВ ва бошқа нуфузли халқаро нашрларда ҳам чоп этилган. Шунингдек, жаҳон чемпионати ўтказилган шаҳарларда ташкил этилган махсус кўргазма майдонлари ва фан-зоналарда Ўзбекистоннинг маданий мероси, миллий қадриятлари ҳамда саёҳат имкониятлари хорижлик мухлисларга намойиш этилди.

Атланта халқаро аэропортида ташкил этилган миллий павилён ҳам ушбу тарғибот ишларининг муҳим қисми бўлди. Қўмита таъкидлашича, FIFA World Cup–2026 тажрибаси йирик халқаро тадбирлар Ўзбекистоннинг халқаро имижини мустаҳкамлаш ва хорижликларнинг мамлакатга бўлган қизиқишини оширишда самарали платформа эканини яна бир бор тасдиқлади.

• FIFA
• Футбол