Татаристон ҳукумати Ўзбекистон билан Ту-214 самолётларини ишлаб чиқаришни қайта тиклаш бўйича ҳамкорликни таклиф қилмоқда.

Бу ҳақда Спутник нашри Татаристон президентининг авиация комплекси ва машинасозлик бўйича ёрдамчиси Равил Зариповга таяниб маълум қилди.

“Бугун Ту-214 самолётларини ишлаб чиқаришни қайта тиклаш тўғрисида қарор қабул қилинди. Лойиҳа, албатта, осон эмас. Бу борада Ўзбекистон томонидан ҳам ҳамкорликка умид қиламиз”, - дейди Зарипов.

Унинг аниқлик киритишича, гап самолётнинг айрим эҳтиёт қисмларини биргаликда ишлаб чиқариш ҳақида кетяпти.

Ўз навбатида Ўзбекистон инвестициялар ва ташқи савдо вазири ўринбосари Хуррам Тешабоевга кўра, Бирлашган авиация корпорацияси (БАК) билан Тошкент механика заводи аллақачон ишлаб чиқариш учун бутловчи қисмлар базаси рўйхатини кенгайтириш бўйича келишувларга эришган.

“Бу, биринчи навбатда, Ил-76 ва Ил-114 самолётлари учун бутловчи қисмлар ишлаб чиқаришга таъсир қилади”, – дейилади хабарда.

Тешабоевнинг қўшимча қилишича, БАК билан Россия авиация саноати эҳтиёжларини қондирадиган Ўзбекистон машинасозлик корхоналари консорциумини яратиш бўйича ҳам келишувга эришилган.

Аввалроқ, РФ Бош вазири ўринбосари Юрий Борисов С.П. Горбунов номидаги Қозон авиация заводида йилига камида 10 та Ту-214 йўловчи самолётларини ишлаб чиқарилаётгани ҳақида маълум қилган.

Маълумот учун, 2021 йилнинг апрелида Ўзбекистон ва Россия самолётсозлик соҳасида қўшма лойиҳаларни амалга ошириш имкониятини муҳокама қилган. Унда гап биринчи навбатда Чкалов номидаги Тошкент авиация ишлаб чиқариш бирлашмаси ҳақида кетган. Мазкур заводда совет даврида “Ил-76” самолётлари, 2012 йилга қадар эса “Ил-114-100” самолётлари ишлаб чиқарилган.

Чкалов номидаги Тошкент авиация ишлаб чиқариш бирлашмаси 1941 йилда пайдо бўлган – уруш бошланиши билан 1932 йилда Москва яқинидаги Химки шаҳрида ташкил этилган завод Тошкентга эвакуация қилинган.

Айни пайтда унинг асосий ҳудудида Тошкент механика заводи жойлашган.

• Миннихонов
• Ўзбекистон
• Samolyot
• Татаристон