Бухоро вилоятида халқаро стандартларга мос, қиймати 300 миллион доллар бўлган янги аэропорт қурилмоқда. Янги мажмуа бир вақтнинг ўзида 20 та самолёт ва 1 200 нафар йўловчига хизмат кўрсатиш имкониятига эга бўлади.

Аэропортни шаҳар маркази билан боғлаш мақсадида 24 километр узунликдаги автомобиль йўли қурилади. Шунингдек, жамоат транспорти учун 5,5 километрли БРТ йўлаги ташкил этилиши режалаштирилган.

Президент Шавкат Мирзиёев аэропорт ва унга олиб борувчи йўлни Мустақиллик байрамигача фойдаланишга топшириш вазифасини қўйди. Янги инфратузилма Бухоронинг транспорт имкониятларини кенгайтириши ва сайёҳлар учун қулайлик яратиши кутилмоқда.

Шунингдек, Туркиянинг “Pegasus” авиакомпанияси Бухорога тўғридан-тўғри авиақатновларни йўлга қўймоқда. Келгуси йилда Малайзия, Индонезия, Кувайт, Миср ва Баҳрайн билан ҳам авиақатновларни бошлаш бўйича топшириқ берилди.