Ўзбекистонда 16 ёшга тўлмаган болаларнинг ижтимоий тармоқлардан фойдаланишини чеклашни назарда тутувчи қонун лойиҳаси ишлаб чиқилиши мумкин. Бу ҳақда “Газета.уз” Мактабгача ва мактаб таълими вазири Эъзоза Каримованинг сўзларига таяниб хабар берди. Қайд этилишича, вазир 26-июнь куни бўлиб ўтган тадбирдан сўнг журналистлар билан суҳбат чоғида мазкур масала юзасидан парламент депутатлари ва сенаторлари билан муҳокамалар олиб борилганини маълум қилган.

“Биз ҳозир ушбу масалани кўриб чиқяпмиз. Бу борада депутатларимиз ва сенаторларимиз билан ҳам фикр алмашдик. Тегишли қонун лойиҳасини ишлаб чиқиб, уни жамоатчилик муҳокамасига қўйишни режалаштиряпмиз. Менимча, бундай тартиб бизда ҳам бўлиши керак”, — деди Эъзоза Каримова.

Ҳозирча мазкур ташаббус юзасидан қонун лойиҳаси ишлаб чиқилмаган бўлиб, унинг аниқ механизмлари ва амал қилиш тартиби жамоатчилик муҳокамаси жараёнида маълум бўлиши кутилмоқда.