Ўзбекистонда 9 ёшдаги қизларни папиллома вирусига қарши эмлаш бошланди. Бу ҳақда Санитария-эпидемиология қўмитаси
хабар берди.
Қайд этилишича, миллий эмлаш календари асосида “Одам папиллома вируси (ВПЧ)”га қарши эмлаш ўтказилмоқда.
Апрель ва май ойларида жойлардаги даволаш-профилактика муассасаларининг эмлаш бригадалари томонидан 9 ёшдаги қизларни эмлаш тадбирлари олиб борилади.
“Бунинг учун 3138 та эмлаш пунктида тиббиёт ходимларининг тайёргарлиги оширилиб, режага асосан 307 064 нафар 9 ёшдаги қизни эмлаш қамрови жараёни давом этаяпти”, дейилади хабарда.
Таъкидланишича, агар ВПЧ вакцинаси билан эмлаш ўтказилса келгусида 1100 нафар аёлни бачадон бўйни саратони билан касалланишининг олди олинади ва 583 нафар аёлнинг ҳаётини сақлаб қолишга эришилади.
Давлат статистика қўмитаси маълумотларига кўра, бачадон бўйни саратони Ўзбекистонда барча ёшдаги аёллар ўртасида кўкрак бези саратонидан кейинги ўринда турадиган ва энг кўп тарқалган саратон касаллиги ҳисобланади.
Жаҳон соғлиқни сақлаш ташкилотига кўра, ҳар йили дунё бўйича 528 000 нафар аёл бачадон бўйи саратони касаллиги билан касалланиб, улардан 266 000 нафари нобуд бўлмоқда.
Ўзбекистонда эса ҳар йили 1660 нафар аёл бачадон бўйни саратони касаллигига чалинаётган бўлса, 608 нафар аёл вафот этмоқда.
31°
Кечаси 18°
