Наманган вилояти ҳокими дунёнинг йирик электрон-онлайн савдо гиганти Хитойнинг Alibaba корпорацияси вице-президенти Крис Чжоу бошчилигидаги делегацияни қабул қилди.

Вилоят раҳбари бу ҳамкорлик ҳар икки томон учун манфаатли эканини таъкидлаб, маҳаллий ҳокимият томонидан керакли барча кўмак берилишини таъкидлади.

“Наманган уч республиканинг етти вилояти жойлашган, 12 миллион аҳоли яшовчи водийнинг қулай нуқтасидадир. Малакали кадрларимиз, замонавий кўникмаларга эга мутахассисларимиз мавжуд. IT-Park ушбу лойиҳани амалга ошириш учун қулай жой”, - деди Шавкатжон Абдураззоқов.

Alibaba корпорацияси вице-президенти Крис Чжоу Наманганга бежизга келишмаганини таъкидлаб, “текстиль, саноат, IT, қишлоқ хўжалиги маҳсулотлари экспортини йўлга қўйиш учун Наманган минтақавий марказ бўлади”, - дея таъкидлади.

Учрашувдан сўнг вилоят раҳбари меҳмонларни минтақавий марказ учун тавсия этилган IT-Park Наманган филиалидаги бино-иншоотлар билан таништирди.

Эслатиб ўтамиз, Alibaba асосчиси, хитойлик тадбиркор Жек Ма 30 июнь куни шахсий самолётида Ўзбекистонга келганди. Тадбиркорнинг ташрифидан мақсади “фақат шахсий” бўлиб, у расмийлар билан учрашмаган ва ОАВ эътиборидан қочган.

• Alibaba