Ўзбекистонда 2026 йилнинг биринчи чорагида солиқ тушумлари 63,6 триллион сўмни ташкил этди. Солиқ қўмитаси маълумотига кўра, бу ўтган йилнинг шу даврига нисбатан 24 фоизга кўп.

Энг катта тушум фойда солиғи ҳиссасига тўғри келган. Ушбу йўналиш бўйича 20,4 триллион сўм йиғилган бўлиб, бу 2025 йилнинг биринчи чорагига нисбатан 43 фоизга ошган.

Қўшилган қиймат солиғи (ҚҚС) тушуми 12,5 триллион сўмни ташкил этиб, 27 фоизга ўсган. Жисмоний шахслардан олинадиган даромад солиғи эса 10,7 триллион сўм бўлиб, 15 фоизга кўпайган.

Шунингдек, ер қаъридан фойдаланганлик учун солиқ тушумлари 6 триллион сўмга, акциз солиғи 4,6 триллион сўмга етган. Ер солиғи 34 фоизга, сув ресурсларидан фойдаланганлик учун солиқ эса 82 фоизга ошгани қайд этилган.

Солиқ қўмитаси маълумотига кўра, қурилиш корхоналари 2,6 триллион сўмдан ортиқ, ишлаб чиқариш корхоналари қарийб 42 триллион сўм, хизмат кўрсатиш соҳаси эса 10,8 триллион сўм солиқ тўлаган.

Бундан ташқари, Ўзбекистонда электрон хизмат кўрсатувчи хорижий компаниялар томонидан 65,7 миллиард сўм солиқ тўланган.