Аномал иссиқ туфайли Ўзбекистонда электр энергиясига талаб тарихда илк бор 300 млн кWҳдан ошди.

Ўзбекистонда аномал иссиқ об-ҳаво шароити электр энергияси истеъмоли бўйича янги тарихий рекордни қайд этди. Энергетика вазирлиги маълумотига кўра, 20-июль куни ягона энергетика тизимида суткалик электр истеъмоли илк бор 300 млн кWҳлик чегарадан ошиб, 301,9 млн кWҳни ташкил қилди.

Шу куни мамлакатда электр энергияси ишлаб чиқариш ҳам рекорд даражага чиқди. Бир сутка давомида 305,4 млн кWҳ электр энергияси ишлаб чиқарилди. Вазирлик бу кўрсаткичлар юқори ҳарорат шароитида кондитсионерлар ва бошқа совитиш ускуналарига талаб ошгани билан изоҳланишини билдирди.

20-июль куни соат 17:22 да ягона энергетика тизимидаги максимал юклама ҳам янги чўққига чиқиб, 14,2 ГWни ташкил этди.

Янги рекордлар

Янги суткалик истеъмол кўрсаткичи ўтган йил ёзги мавсумида қайд этилган энг юқори натижадан 29,3 млн кWҳга ёки 10,75 фоизга юқори бўлди.

Шунингдек, 18-июль куни қайд этилган 294,4 млн кWҳлик аввалги рекорд ҳам икки кун ичида янгиланди. Янги натижа ундан 7,5 млн кWҳга ёки 2,55 фоизга кўп бўлди.

Электр энергияси ишлаб чиқариш бўйича ҳам аввалги рекорд ортда қолдирилди. 20-июль кунидаги 305,4 млн кWҳлик ҳажм 18-июлдаги 297,1 млн кWҳлик натижадан 8,3 млн кWҳга ёки 2,79 фоизга юқори бўлди.

Узилишлар кузатилди

Энергетика вазирлиги маълум қилишича, юқори юкламага қарамай, ягона энергетика тизими истеъмолчиларни узлуксиз электр билан таъминлаш учун барқарор ишлаган. Бироқ айрим ҳудудларда тармоқларда носозликлар юзага келган.

Хусусан, Тошкент шаҳрининг Олмазор, Яккасарой, Чилонзор ва Яшнобод туманларида минглаб истеъмолчилар қисқа муддат электр таъминотисиз қолди. Барча ҳолатларда авария-таъмирлаш бригадалари носозликларни тезкор бартараф этиб, электр таъминотини қайта тиклади.

21-июль тонгида Сергели ва Олмазор туманларида ҳам 600 нафар истеъмолчи вақтинча электрсиз қолган бўлса-да, таъмирлаш ишлари якунлангач, электр таъминоти тўлиқ тикланган.

Эслатиб ўтамиз, 13-июль куни Ўзбекистонда бир суткалик электр энергияси истеъмоли илк марта 278,6 млн кWҳга етиб, ёзги мавсум учун янги рекорд ўрнатган эди.