2027-йилда мамлакатда киши бошига ЯИМ 5 минг доллардан ошиши кутилмоқда. Бу Ўзбекистонга юқори-ўрта даромадли давлатлардан бирига айланиш имконини беради. Юқори даромадли давлатлар қаторидан эса тахминан 2040-йилда жой олиш мумкин.

2027-йилда Ўзбекистонда аҳоли жон бошига ялпи ички маҳсулот (ЯИМ) 5 минг доллардан ошиши прогноз қилинмоқда. Бу ҳақда 2027–2029-йилларга мўлжалланган Фискал стратегиядан маълум бўлди.

Стратегияда келтирилган прогнозга кўра, 2026-йилда Ўзбекистон иқтисодиёти 8,1 фоизга ўсиб, 2 квадриллион 183 триллион сўмга етади. Натижада аҳоли жон бошига ЯИМ 4 629 долларни ташкил қилади.

Бу Жаҳон банки томонидан тавсифланувчи юқори-ўрта даромадли мамлакатлар учун белгиланган 4 636–14 375 доллар оралиғидан бироз камроқдир.

Шунга қарамай, 2027-йилда иқтисодий ўсиш 6,9 фоиз атрофида бўлиши прогноз қилинмоқда. Бунда иқтисодиёт 2 квадриллион 474 триллион сўмга етади ва киши бошига ЯИМ 5 106 долларгача кўтарилади.

Шу тариқа, Ўзбекистон ушбу кўрсаткич билан дунё бўйлаб юқори-ўрта даромадли давлатлар қаторидан жой олиши мумкин.

2025-йил ҳолатига кўра, Ўзбекистон қуйи-ўрта даромадли давлатлардан бири ҳисобланади. 1999-йилдан 2008-йилгача мамлакат кам даромадли давлат сифатида қайд этилган.