Афғонистоннинг Нимрўз вилояти саҳросида Эронга ноқонуний йўллар билан ўтмоқчи бўлган 19 нафар ёш йигитдан беш нафарининг жасади топилди. Яна 14 нафарининг тақдири эса номаълумлигича қолмоқда. Бу ҳақда ТОЛОнеwс хабар берди.

Хавфсизлик расмийларининг маълум қилишича, ушбу гуруҳ Ҳилманд ва Нимрўз вилоятлари саҳролари орқали Эронга яширинча ўтишга уринган. Уларнинг беш нафари жазирама иссиқ ва сувсизлик оқибатида вафот этган.

Афғонистоннинг жануби-ғарбида жойлашган Нимрўз вилояти Покистон ва Эронга ноқонуний ўтишга уринадиган афғонлар учун асосий транзит йўналишларидан бири ҳисобланади. “Толибон” ушбу йўналиш орқали ноқонуний юришни тақиқлаган.

Шунга қарамай, айрим ёшлар одам савдогарлари ёрдамида Эронга яширинча ўтишда давом этмоқда.

Аввалроқ Кобул аҳолиси электр узилишидан шикоят қилаётгани ва ток фақатгина “Толибон”га алоқадор оилаларда борлиги ҳақида хабар берилганди.