Ўзбекистоннинг Беларусдаги элчиси Раҳматулла Назаров инвеститсия ва ташқи савдо масалаларига бефарқлиги учун лавозимидан озод этилди. Бу ҳақда бугун, 21-июль куни Президент Шавкат Мирзиёев раислигида ўтказилган жорий йилнинг биринчи ярмида эришилган натижалар ва йил якунигача амалга ошириладиган ишлар муҳокамасига бағишланган видеоселектор йиғилишида маълум қилинди.

Қайд этилишича, сўнгги йилларда олий даражадаги 52 та ташриф доирасида 213 миллиард долларлик 1 617 та инвеститсия лойиҳаси бўйича келишувларга эришилган. Бироқ ушбу лойиҳалар ижросини назорат қилишда сусткашликлар кузатилаётгани қайд этилган.

Эндиликда “йўл хариталари” Ҳисоб палатаси ва Ташқи ишлар вазирлиги томонидан юритилиши белгиланди.

Бош вазирга ҳар ҳафта тармоқ раҳбарлари, ҳокимлар ва элчилар билан биргаликда “йўл хариталари”ни давлатлар кесимида, “лойиҳабай” муҳокама қилиш топширилди.

Давлат раҳбари хориждаги дипломатик ваколатхоналар фаолияти бўйича ҳам кўплаб эътирозлар борлигини билдирди. Беларусдаги элчи инвеститсия ва ташқи савдо масалаларига бефарқлиги учун лавозимидан озод этилган, Франсия, Австрия, Испания, Италия, Уммон, Индонезия, Малайзия ва Сингапурдаги элчиларнинг фаолияти ҳам етарли даражада кўринмаётгани қайд этилган.

Президент Администратсияси раҳбари Саида Мирзиёевага комиссия тузиб, иқтисодий дипломатия, инвеститсия ва экспорт бўйича дипломатик ваколатхоналарнинг ишини таҳлил қилиш, ўз вазифасини бажара олмаётганларни ёш, замонавий фикрлайдиган кадрлар билан алмаштириш юзасидан таклифлар киритиш топширилди.