Тунисда стол тенниси бўйича ёш тоифалари бўйича жаҳон сериясига кирувчи мусобақа бўлиб ўтди. 

Аҳамиятлиси, унда иштирок этган Ўзбекистон вакиллари 1 тадан олтин, кумуш ва бронза медалларига сазовор бўлишди.

Ярим финалгача етиб борган Аружан Камалова ҳам ажойиб иштироки билан мутахассисларнинг эътирофига сазовор бўлди ва турнирни учинчи ўринда якунлади. 

Кўпчиликнинг диққат-маркази финал баҳсига қаратилди. Унда юртдошимиз Асел Эркебаева Токио-2020 Олимпиадасида иштирок этган энг ёш стол теннисчи суриялик Хенд Заза билан баҳс олиб борди. Қизиқарли баҳс Эркебаеванинг ғалабаси билан якунланди. Ушбу тоифадаги ғолиб ва совриндорлар қуйидагича кўриниш олди:

1. Асел Эркебаева (Ўзбекистон)
2. Хенд Заза (Сурия)
3. Аружан Камалова (Ўзбекистон)
3. Эла Саиди (Тунис)

Шунингдек, 19 ёш тоифасида иқтидорли вакилаларимиздан бири Марҳабо Магдиева кумуш медал билан тақдирланди. Ҳамюртимиз муросасиз кечган финал беллашувида ҳиндистонлик Сухана Саинига 2:3 ҳисобида имкониятни бой бериб қўйди.

• Ўзбекистон
• стол тенниси