Ҳиндистоннинг Гоа шаҳрида шахмат бўйича Жаҳон кубоги ўз якунига етди.

Ушбу нуфузли мусобақада дунёнинг турли мамлакатларидан 200 нафардан ортиқ шахматчи бош соврин учун кураш олиб борди. 

Ўзбекистонлик шахматчи Жавоҳир Синдаров беллашувларнинг финалига қадар етиб борди. Ҳал қилувчи баҳсда Синдаровга хитойлик Вей Йи рақиблик қилди. 

Мазкур қарама-қаршиликнинг дастлабки икки партияси дуранг билан якунланганди. Якунда бугун ғолиб тай-брейкда аниқланди. 

Тай-брейк якунига кўра, Жавоҳир Синдаров 1,5 : 0,5 ҳисобларида ғалаба қозонди ва Жаҳон кубоги ғолибига айланди. 

Маълумот учун, Жавоҳир Синдаров мазкур мусобақа давомида Никита Петров (Черногория), Николас Теодору (Греция), Ю Янгйи (Хитой), Фредрик Сване (Германия), Хосе Мартинес Алкантара (Мексика), Нодирбек Якуббоев (Ўзбекистон) каби шахматчиларни енгиб, финалга қадар етиб келди. 

Ғалаба орқали Жавоҳир Синдаров 120 минг АҚШ долларига эга бўлди. 

Синдаров 2026 йилнинг март ойида Кипрда ўтказиладиган номзодлар турнирида иштирок этади. 

• Ҳиндистон
• Жаҳон кубоги
• Шахмат