Мухсинхўжа Абдураҳмонов Ўзбекистоннинг Фижидаги биринчи элчиси этиб тайинланди. У бир вақтда Япониядаги элчи вазифасини ҳам бажаради.

“Ўзбекистоннинг Фижидаги элчиси (қароргоҳи Токио шаҳрида) этиб тайинланган Мухсинхўжа Абдураҳмонов мамлакат президенти Рату Найкама Тавакеколати Лалабалавуга ишонч ёрлиқларини топширди”, деб хабар қилмоқда “Дунё” ахборот агентлиги.

Расмий тадбирлардан сўнг бўлиб ўтган суҳбат давомида Ўзбекистон ва Фижи ўртасидаги сиёсий, савдо-иқтисодий, маданий-гуманитар, таълим ва туризм каби йўналишлардаги алоқаларнинг ҳозирги ҳолати ва истиқболлари юзасидан фикр алмашилган.

Президент Найкама Лалабалаву икки мамлакат географик жиҳатдан узоқда жойлашган бўлса-да, уларни ўзаро ҳурмат, конструктив мулоқот ва умумий қадриятларга асосланган дўстона алоқалар боғлаб туришини таъкидлаган.

Фижи Океаниядаги мустақил давлат бўлиб, жанубий Тинч океанида, Австралия ва Янги Зеландиянинг шимолий-шарқий қисмида жойлашган. У 330 дан ортиқ орол ва кичик ороллардан ташкил топган, тахминан 900 минг киши яшайди. Ўзбекистон ва Фижи ўртасида дипломатик муносабатлар 2010 йил 16 июнь куни ўрнатилган.

Маълумот учун, Мухсинхўжа Абдураҳмонов 2021 йил 27 сентябрь куни Япония императори Нарухитога Ўзбекистон элчиси сифатидаги ишонч ёрлиқларини топширган.

• Элчи
• Ўзбекистон
• Тайинлов