Тошкент метрополитенида йўловчилар оқими ошгани сабабли вагон паркини кенгайтириш режалаштирилмоқда. 2026 йил сентабр–октабр ойларида метро хизматларидан 61,7 миллион нафар йўловчи фойдаланган. Бу 2025 йилнинг шу даврига нисбатан 20 фоизга кўп. Бу ҳақда “Тошкент метрополитени” АЖ маълум қилди.
Қайд этилишича, бугунги кунда метрополитен кунига 1,2 миллион нафардан ортиқ йўловчига хизмат кўрсатмоқда. Айни пайтда вагон паркида 55 та замонавий ва хизмат муддатини ўтаб бўлган 30 та эски ҳаракат таркиби мавжуд.
Эски поездлар ўртача 1 000 нафаргача, янги ҳаракат таркиблари эса 1 300 нафаргача йўловчи ташиш имкониятига эга. Йўловчилар оқими юқори бўлган бекатларга қўшимча захира поездлари йўналтирилмоқда, поездлар ҳаракати интерваллари эса имкон қадар қисқартирилган.
Метрополитен маълумотига кўра, 2027–2028 йилларда Тошкент метроси учун беш вагонли 28 та замонавий ҳаракат таркибини харид қилиш режалаштирилган. Шунингдек, мавжуд замонавий поездларга қўшимча вагонлар харид қилиш орқали яна 40 та ҳаракат таркибидаги вагонлар сонини бештага етказиш кўзда тутилган.
Метрополитен йўловчиларга гавжумликни камайтириш мақсадида бир қатор тавсиялар ҳам берди. Жумладан, поездларнинг фақат бош вагонларидан эмас, балки ўрта вагонларидан ҳам фойдаланиш, имкон қадар йўловчилар камроқ бўлган муқобил бекатларни танлаш тавсия этилди.
Хусусан, Чилонзор бекати ўрнига Мирзо Улуғбек, Халқлар дўстлиги бекати ўрнига эса Миллий боғ бекатидан фойдаланиш мумкинлиги қайд этилди. Шунингдек, йўловчилардан поездга чиқишда аввал тушаётганларга йўл бериш, хавфсизлик қоидаларига риоя қилиш ва бекатларда тартиб сақлаш сўралди.
“Тошкент метрополитени” АЖ йўловчилар оқимини ҳисобга олган ҳолда ташиш имкониятларини кенгайтириш ва хизмат сифатини яхшилаш бўйича ишлар давом эттирилишини билдирди.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!