Ўзбекистон президенти 9 ноябрь куни “Тиббиёт ходимлари куни муносабати билан соҳа ходимларидан бир гуруҳини мукофотлаш тўғрисида”ги фармонини имзолади.

Ҳужжатда қайд этилишича, соҳа вакилларидан бир гуруҳи мамлакатда соғлиқни сақлаш тизими ва фармацевтикани ривожлантириш, тиббий хизматлар сифатини ошириш, соҳани тубдан ислоҳ этишга қаратилган дастурлар ижросини муваффақиятли таъминлаш борасидаги кўп йиллик самарали меҳнати, ўзининг билим ва салоҳияти, профессионал маҳорати билан диагностика ва даволаш амалиётида замонавий, юксак технологик усулларни кенг қўллаш, аҳоли саломатлигини ишончли муҳофаза қилиш, жамиятда соғлом турмуш тарзини мустаҳкамлашга муносиб ҳисса қўшиб келаётгани, юқори малакали кадрларни тайёрлаш йўлидаги катта хизматлари ҳамда ижтимоий ҳаётдаги фаол иштироки учун мукофотланди.

Бир гуруҳ шифокорлар “Фидокорона хизматлари учун”, “Меҳнат шуҳрати”, “Соғлом авлод учун”, “Саломатлик” “Дўстлик” орденлари, “Соғлом турмуш”, “Келажак бунёдкори”, “Шуҳрат” медалларига лойиқ кўрилди.

Маълумот учун, Ўзбекистонда ҳар йили ноябрь ойининг иккинчи якшанбаси тиббиёт ходимлари куни сифатида кенг нишонланади. Бу орқали соҳа фидойиларининг аҳоли саломатлигини таъминлаш йўлидаги заҳматли меҳнати эътироф этилади.

• Фармон
• Мукофот
• Шифокор
• Тиббиёт