“Новие люди” партияси депутатлари таклифига кўра, меҳнат муҳожирлари расмий маошидан ортиқ маблағни хорижга ўтказмаслиги керак. Ташаббус муаллифлари Алексей Нечаев, Сардана Авксентиэва ва Владимир Плякиннинг фикрича, бундай тақиқ “молиявий операцияларнинг шаффофлигини ошириш, яширин иқтисодиётга қарши курашиш, солиқ тушумларини кўпайтириш ва иқтисодий хавфсизликни таъминлаш” учун зарур. Таклиф Марказий банк раҳбари Элвира Набиуллинага юборилди, деб ёзади “ТАСС”.

Парламент аъзоларининг таъкидлашича, амалдаги қонунларда пул ўтказмалари миқдори мигрантларнинг расмий маошларига мос келишини назорат қилишнинг самарали механизмлари мавжуд эмас. Уларнинг фикрича, бу хориж фуқароларига ноқонуний даромадларини яшириш, солиқлардан қочиш ва Россиядан пул олиб чиқиш имконини беради. Депутатлар хорижга рухсат этилган миқдордан ортиқ пул ўтказмоқчи бўлган мигрантлардан олинган даромаднинг қонунийлигини тасдиқловчи декларация тақдим этиш мажбуриятини юклашни таклиф қилмоқда.

Ўз навбатида, банклар шубҳали операцияларни аниқлаш ва олдини олиш учун чет элликларнинг молиявий операцияларини текширишни кучайтириши керак, дейилади хатда.

Расмийлар меҳнат муҳожирлари учун давлат божини ошириш ва кенгайтириш масаласини ҳам муҳокама қилмоқда. Қонун лойиҳасига кўра, патент бериш ҳамда ишлаш учун рухсатноманинг амал қилиш муддатини узайтириш учун 4,2 минг рубль, ушбу ҳужжатларнинг дубликати ёки уларга ўзгартириш киритиш учун эса 2,1 минг рубль миқдорида тўлов белгиланиши кўзда тутилмоқда.

Шунингдек, бошқа мажбурий тўловларни жорий этиш ёки уларни ошириш, жумладан, яшаш жойи бўйича рўйхатдан ўтиш ва Россияда бўлиш муддатини узайтириш тартибларини кучайтириш таклиф қилинмоқда.

Ички ишлар вазирлиги маълумотларига кўра, 2024 йил охирида Россияда 6,3 миллион чет эл фуқароси бўлган. Уларнинг аксарияти кадрлар етишмаётган соҳаларда фаолият юритади. Жумладан, 765 мингдан ортиқ муҳожир қурилишда, 318 минг нафари савдо ва транспортни таъмирлаш соҳасида, 274 минг нафари эса ишлаб чиқариш корхоналарида ишлайди, дейилади Ички ишлар вазирлиги хабарида.

• Davlat boji
• Россия