Сенат раисининг биринчи ўринбосари Содиқ Сафоев жорий йилнинг 31 август куни Президент Шавкат Мирзиёевнинг қатағон қурбонлари хотирасига бағишланган маросимдаги нутқига Россия ОАВларида берилган муносабатларни “популистик ваҳима” сифатида баҳолади. Сафоев бу ҳақда “Twitter” саҳифасида ёзиб қолдирган.

“Президент Шавкат Мирзиёевнинг қатағон қурбонлари хотирасига бағишланган маросимдаги нутқига Россия ОАВларида берилган “муносабатлар”ини ўқиб чиқдим.

Мустабид тузум қатағон қурбонлари хотирасини ёд этган Ўзбекистон президентининг мувозанатли, босиқ ва ўта самимий нутқига мутлақо ноадекват муносабат. Ўзи мунозара нима ҳақида? Мустабид тузум шафқациз ва бераҳм бўлганлигими?

Ёки ҳалок бўлганлар ҳақиқатан ҳам ғайриинсоний қатағон қурбонлари бўлганлигими? Ақли тўғри ва хотираси аниқ бўлган ҳеч қайси инсон у ёки буни сўроқ қила олмайди.

Тузумга қарши, Ватан озодлиги учун ўз овозини баланд кўтаришга журъат этган минглаб юртдошларимиз учун полигон ва қабристон бўлиб қолган жойда ўтган маросимда мен ҳам қатнашдим. У чин қалбдан, ёруғ ва тантанали, қандайдир самимий, инсоний тарзда ўтди.

Айнан шу жойда жаллодлар томонидан ўз ўлимини жасорат билан қабул қилганлар олдидаги қарзимизни инсоний равишда қайтардик. Бу энди шов-шувли сиёсийлаштириш ва популистик ваҳима учун сабабми?” – дея ёзган Содиқ Сафоев..

• Bosma OAV
• Qatag‘on
• Россия
• Сафоев
• Шавкат Мирзиёев