Самарқанд вилоятида тунги клубда жанжал қилган барча шахсларга нисбатан жиноят иши қўзғатилди. Бу ҳақда Самарқанд вилояти ИИБ Ахборот хизмати хабар берди.

Қайд этилишича, жорий йилнинг 7 август куни фуқаро Э.Б. ўзининг таниши билан Самарқанд шаҳрида жойлашган “Bassiane” номли тунги клубга дам олиш мақсадида кирмоқчи бўлган.

Аммо, шу вақтда клубда қўриқчи бўлиб ишловчи Р.М. уларни клубга киритмаслигини айтиб, турли ножўя сўзлар билан ҳақорат қилган. Кейин, бир гуруҳ шериклари билан уларни уриб, тан жароҳати етказган.

Шунингдек, жанжалда бир киши вафот этганлиги тўғрисида тарқалган хабарлар ҳақиқатга тўғри келмаслиги айтилган.

Хабарга кўра, мазкур ҳолат юзасидан фуқаро Р.М. ва бошқа шахсларга нисбатан Самарқанд шаҳри бўйича ИИО ФМБ ҳузуридаги Тергов бўлими томонидан Ўзбекистон Республикаси Жиноят Кодексининг 277-моддаси 2-қисми “б” банди билан жиноят иши қўзғатилиб, тергов ҳаракатлари олиб борилмоқда.

• Самарқанд
• Тунги клуб