“Мамлакатимиз Бош консулхонаси кўмагида Россиянинг Санкт-Петербург шаҳрида ота-она қарамоғисиз қолган олти нафар вояга етмаган ватандошларимиз Ўзбекистонга олиб келинди”, – деб хабар қилмоқда “Дунё” ахборот агентлиги.

Ўзбекистондан борган ишчи гуруҳ 10 кун давомида барча керакли ҳужжатларни йиққан. Ота-она қарамоғисиз қолган болалар Санкт-Петербургдаги вояга етмаганлар учун ижтимоий реабилитация марказлари ва болалар учун “Транзит” ижтимоий бошпанасига етказилган.

Вояга етмаган болалардан бири уч йилдан бери онасидан айро тарзда, отаси билан яшаб келган. Отаси уни онасидан ноқонуний равишда олиб қўйган. Боланинг оиласи унинг ҳаёти ва соғлиғига таҳдид соладиган ижтимоий ноқулай муҳитни бошдан кечирган.

Бош консулхона ходимлари ва мутасадди ташкилотлар ходимлари боланинг яшаш жойида бўлиб, вояга етмаган ўзбекистонликларни ватанга қайтариш чораларини кўришган.

Ўзбекистон Бош консулхона томонидан Россия ҳудудларида қаровсиз қолган олти нафар боланинг ватанга қайтиши учун тегишли гувоҳномалар расмийлаштирилиб, Санкт-Петербург-Тошкент авиарейси билан Ўзбекистонга кузатиб қўйилган.

• Болалар
• Ўзбекистонлик
• Sankt-Peterburg