Ўзбекистонлик яримҳимоячи Остон Ўрунов «Спартак»ни тарк этади.

«Қизил-оқлар» матбуот хизматининг хабар беришича, 21 ёшли футболчи билан тузилган келишув томонлар келишувига кўра бекор қилинган.

«Остонга келгуси фаолиятида омад тилаймиз!» — деб ёзади Москва клуби матбуот хизмати.

Келтирилишича, Остон Ўрунов фаолиятини Россия Премьер-лигасининг бошқа клубида давом эттиради.

Ўзбекистонлик яримҳимоячи эркин агент сифатида «Урал» сафига қўшиладиган бўлди. Ўрунов бугун ёки эртага шартнома имзолаш учун Екатеринбург шаҳрига етиб боради.

Бу хабарни «Урал» президенти Григорий Иванов ҳам тасдиқлаган.

«Шартнома имзоласак, бу ҳақда расман эълон қиламиз. Қароргоҳимизга етиб келсин, кўрамиз. Ҳа, биз музокара ўтказдик.

Энди уни кутамиз. У қандай ҳолатда ҳали билмаймиз. Агар у асосий таркибда ўйнайдиган спорт формада бўлса, 1,5 йиллик шартнома имзолаймиз. У миллий жамоасида ўйнаган бўлсада, клубида ўйнамади. Бугун ёки эртага келсин, барчаси маълум бўлади», – дейди екатеринбургликлар клуби раҳбари.

Қайд этиш мумкин, Ўрунов 2020 йилда «Спартак» сафига ўтиб, 9 та ўйинда 1 та гол урган. Кейин эса ижара асосида «Уфа»да ҳаракат қилганди.

Маълумот учун, «Урал» РПЛ 7-туридан кейин 1 очко билан сўнгги 16-ўринда бормоқда.

• Футбол
• Легионерлар
• Остон Ўрунов
• Трансферлар