Сурхондарёда автомашинанинг аввалги эгаси жиноий гуруҳ бўлиб транспорт воситасини олиб қочди. Бу ҳақда ИИВ Йўл ҳаракати хавфсизлиги хизмати маълум қилди.

Қайд этилишича, жорий йилнинг 25 ноябрь куни Бойсун тумани “Ширинобод” маҳалласида яшовчи 44 ёшли М.К. Бойсун тумани ИИБга ариза билан мурожаат қилиб, жорий йилнинг 24 ноябрь кунидан 25 ноябрь кунига ўтар кечаси яшаш уйи дарвозаси олдида ўзига тегишли “ВАЗ 2107” русумли автомашинасини номаълум шахс олиб қочиб кетгани тўғрисида маълум қилган.

Олиб борилган тезкор-қидирув ишлари натижасида жабрланувчига тегишли бўлган автомашина 27 ёшли О.Б., 18 ёшли Т.Д., 18 ёшли П.М. ва вояга етмаган 17 ёшли Х.С. томонидан ўғирлангани аниқланган.

Дастлабки тергов жараёнида аниқланишича, олиб қочилган автомобиль муқаддам О.Б.га тегишли бўлгани, бироқ у кейинчалик автомашинани сотиб юборганлиги аниқланган.

“Жабрланувчи томонидан автомашина йўқолганлиги тўғрисидаги ҳуқуқни мухофаза қилувчи органларга берилган хабардан сўнг жиноятчилар томонидан автомашина яширилган ҳудуд ўзгартирилганлиги аниқланган, бироқ ИИО ходимларининг ҳамкорликдаги олиб борилган тезкор ишлари натижасида “ВАЗ 2107” русумли автомашина топилган ва тегишли тартибда ҳужжатлаштириб олинган”, – дейилади хабарда.

Мазкур ҳолат юзасидан Бойсун тумани ИИБ ҳузуридаги Тергов гуруҳи томонидан мазкур шахсларга нисбатан Ўзбекистон Республикаси Жиноят кодекснинг 267-моддаси 2-қисми “Б” банди ( Транспорт воситасини бир гуруҳ шахслар томонидан олдиндан тил бириктириб олиб қочиш) билан жиноят иши қўзғатилган.

Ҳозирда ҳолат юзасидан тергов ҳаракатлари олиб борилмоқда.

• ИИБ
• Жиноят
• O'g'irlik
• Сурхондарё
• ЙҲХББ