Сурхондарё вилоятининг Денов тумани “Элобод” маҳалласида яшовчи келин турмуш ўртоғининг онасига “яхши қарамагани” учун қайноғаси томонидан калтакланди. Бу ҳақда Сурхондарё вилояти ИИБ матбуот хизмати хабар берди.

Ҳодиса жорий йилнинг 21 апрель куни соат 17:30 ларда содир бўлган. Фуқаро Қ.Й. шу маҳаллада яшовчи қариндоши Ж.М. исмли аёл билан илгаридан давом этиб келаётган оилавий низолари сабабли фуқаро Ж.М.нинг яшаш уйида ўзаро жанжаллашиб қолиши натижасида аёл танасининг турли жойларига қўллари билан уриб, тан жароҳати етказган.

Денов тумани СТEнинг дастлабки маълумотномасига кўра, “Ўртача оғир тан жароҳатлари” деб баҳоланиши кўрсатилган.

Мазкур ҳолат юзасидан, Денов тумани ИИБ ҳузуридаги Тергов бўлими томонидан Ўзбекистон Республикаси Жиноят кодексининг 105- моддаси 2-қисми “г” банди билан жиноят иши қўзғатилиб, тергов ҳаракатлари олиб борилмоқда. Гумонланувчи шахс Ўзбекистон Республикаси Жиноят процессуал кодексининг 221-моддаси тартибида ушланган. Тергов ҳаракатлари Сурхондарё вилояти Ички ишлар бошқармаси томонидан назоратга олинган.

• ИИБ
• Сурхондарё
• Xabardor.uz