Тошкент шаҳрининг Учтепа туманида 24-октябрь куни хонадон ёнғинида ҳалок бўлган аёлнинг ўлими юзасидан қасддан одам ўлдириш моддаси билан жиноят иши қўзғатилди. Дастлабки маълумотларга кўра, хонадонга атайлаб ўт қўйилган бўлиши мумкин. Бу ҳақда Бош прокуратура матбуот котиби Ҳаёт Шамсутдинов ҚАЛАМПИР.УЗ сўровига жавобан маълум қилди.

Қайд этилишича, ёнғин 24-октябрь куни соат 02:00 атрофида содир бўлган. Ҳодиса жойидан 2000-йилда туғилган аёлнинг жасади топилган. Унинг елкасидан сон қисмигача бўлган жойларида термик жароҳатлар аниқланган.

Ҳодиса жойини кўздан кечириш давомида ошхона, ётоқхона ва меҳмонхонада бир-бирига боғлиқ бўлмаган учта ёнғин ўчоғи аниқланган. Шунингдек, хонадонга қасддан ўт қўйилган бўлиши мумкинлигини кўрсатувчи аломатлар қайд этилган.

Мазкур ҳолат юзасидан 24-октябрь куни Учтепа тумани прокуратураси томонидан Жиноят кодексининг 97-моддаси 1-қисми — қасддан одам ўлдириш моддаси билан жиноят иши қўзғатилган.

Ҳозирда дастлабки тергов ҳаракатлари давом этмоқда. Тергов натижаларига кўра, қонуний қарор қабул қилиниши ва қўшимча маълумот берилиши билдирилган.

Эслатиб ўтамиз, ҳодиса вақтида қутқарувчилар автомобили кўп қаватли уйлар олдидаги йўлларда тартибсиз қолдирилган автомобиллар сабабли ҳаракатланишда қийналгани ҳақида ҳам хабар берилган эди.