Олий таълим муассасалари талабаларининг давлат идораларида ҳақ тўланадиган стажировка ўташи тўғрисидаги тартиб ишлаб чиқилмоқда. Бу ҳақдаги ҳужжат лойиҳаси жамоатчилик муҳокамаси учун эълон қилинган.

Қайд этилишича, мазкур тартиб Меҳнат кодекси ҳамда “Таълим тўғрисида”ги қонунга мувофиқ олий таълим муассасалари (ҳарбий, махсус олий таълим муассасаларидан ташқари) талабаларининг давлат идораларида ҳақ тўланадиган стажировка ўташ тартибини белгилайди.

Ҳужжат лойиҳасига мувофиқ стажировка давомийлиги магистратура талабалари учун иккинчи ёки учинчи семестрни тугатганидан сўнг уч ярим ой, бакалавриат талабалари учун эса тўртинчи семестрни тугатганидан кейин бир ой этиб белгиланади.

Стажировка дастури (режа-жадвали) стажировка бошланишидан камида бир ой олдин қабул қилувчи ташкилотнинг стажировка менежери билан келишилган ҳолда амалга оширилади.

Қабул қилувчи ташкилотда стажёрларни ишга қабул қилиш ташкилотда мавжуд бўлган бўш (вакант) иш ўринлари (лавозимлари) учун ёки ўриндошлик асосида эгаллаб турилган иш ўринлари (штат лавозимлари) учун амалга оширилади.

Стажёр учун синов муддати белгиланмайди. Унинг иш вақти давомийлиги ҳафтасига 36 соатдан ошмаслиги керак (истисно ҳолларда 40 соат).

Стажёрларнинг меҳнатига ҳақ тўлаш қабул қилувчи буджет ташкилоти томонидан бўш (вакант) иш ўринлари ҳисобидан шакллантирилган меҳнатга ҳақ тўлаш фондининг тежалган маблағлари  ҳисобидан, бюджетдан ташқари ташкилотларда эса – ўз маблағлари ҳисобидан амалга оширилади.

Давлат ташкилотларида стажировкадан ўтаётган стажёрларнинг меҳнатига ҳақ тўлашда:

– магистратурада таҳсил олаётган стажёрлар учун – стажировка бошланган кунида белгиланган энг кам иш ҳақининг бир ярим баравари миқдорида;

– бакалавриатда таҳсил олаётган стажёрлар учун – стажировка бошланган кунида белгиланган энг кам иш ҳақи миқдорида белгиланади.

Шунингдек, стажировка даврида талабаларга стипендиялар умумий белгиланган тартибда тўланади.

Маълумот учун, стажёрларнинг меҳнатига ҳақ тўлаш бўйича смета харажатлари йилига 178,5 млрд. сўм, шу жумладан, магистрлар учун 42,8 млрд сўм, бакалаврлар учун 135,7 млрд. сўмни ташкил этади

• Маош
• Меҳнат
• Стажировка
• Талабалар