Ўзбекистон Ташқи ишлар вазирлиги матбуот хизмати айрим блогерлар ва ижтимоий тармоқ фойдаланувчилари томонидан илгари ҳал этилган ва ўз ечимини топган айрим масалаларнинг қайта муҳокамага олиб чиқилаётганига ўз муносабатини билдирди.

“Сўнгги пайтларда айрим блогерлар ва ижтимоий тармоқ фойдаланувчилари томонидан илгари ҳал этилган ва ўз ечимини топган баъзи масалаларнинг қайта муҳокамага олиб чиқилаётганини кузатяпмиз. Бу каби ёндашув, табиийки, жамоатчиликда асоссиз чалкашлик ва ортиқча хавотир уйғотиши мумкин.

Ҳурматли оммавий ахборот воситалари вакиллари ва фаол блогерлар! Сизнинг овозингиз, холис фикрингиз ва ёритаётган мавзуларингиз жамиятимиз ҳаётида жуда катта аҳамиятга эга. Шунинг учун сизлардан долзарб, бугунги кун учун ҳақиқатан ҳам муҳим бўлган масалаларни кўтаришингизни сўраб қоламиз.

Ташқи ишлар вазирлиги, мамлакатимизнинг хориждаги дипломатик ваколатхоналари ва консуллик муассасаларининг асосий вазифаларидан бири – ҳар бир фуқаромизнинг ҳуқуқ ва манфаатларини ҳимоя қилишдир.

Бу борада биз доимо масъулмиз ва вазифамизга қатъий содиқмиз. Шу йўлда давлат идоралари, ОАВ ва фаол блогерларнинг бир-бирини тўлдирувчи ҳамкорлиги янада муҳимдир.

Биз ҳаммамиз бир мақсад йўлида – фуқароларимиз фаровонлиги, Ватанимиз шаъни ва обрўйини улуғлаш йўлида хизмат қиляпмиз. Шундай экан, ҳар бир сўзимизда, ҳар бир хабаримизда масъулиятни чуқур ҳис этиб, юртимиз равнақи йўлида бир-биримизга кўмак беришимиз зарур” - деб ёзади Ташқи ишлар вазирлигининг ахборот хизмати раҳбари Ахрор Бурҳонов.

• Блогер
• Ижтимоий тармоқ
• Мурожаат
• Tashqi ishlar vazirligi