Татаристон раҳбари Рустам Минниханов 22-23 март кунлари амалий ташриф билан Ўзбекистонда бўлади. Бу ҳақда Sputnik Россиянинг Ўзбекистондаги элчихонасига таяниб хабар бермоқда.

Қайд этилишича, ташриф доирасида республиканинг қатор вазирлик ва идораларида икки томонлама музокаралар ўтказилиши кутиляпти.

Шунингдек, Чирчиқ кимё-саноат технопарки қурилишига тамал тошини қўйиш маросимида иштирок этиш режалаштирилган.

“Президент Шавкат Мирзиёевнинг қарорига асосан Тошкент вилояти ҳокимлиги, “Ўзкимёсаноат” АЖ ва Татаристон маъмурияти ўртасида “Химград” АЖ (Татаристон) билан ҳамкорликда имзоланган келишувларга биноан тез орада вилоятда “Чирчиқ” технопарки пайдо бўлади”, – дейилади хабарда.

Маълум қилинишича, технопарк “Олмалиқ КМК” акциядорлик жамиятининг нодир металлар ва қаттиқ қотишмалар ишлаб чиқариш илмий-ишлаб чиқариш бирлашмаси ва “Максам-Чирчиқ” АЖга қарашли 51-сонли металл натрий ишлаб чиқариш цехи ҳудудида жиҳозланади. У умумий майдони 31,24 гектар бўлган ҳудудда жойлашган бўлади.

• Миннихонов
• Ўзбекистон
• Татаристон