Қозоғистон Президенти Қосим-Жомарт Тўқаевнинг президентлик муддати янги Конститутсия кучга кириши муносабати билан «ноллаштирилди». Натижада у яна президентликка номзодини қўйиш ҳуқуқига эга бўлди. Бу ҳақда 7-июль куни мамлакат Конститутсиявий суди маълум қилди. 1-июлдан Қозоғистонда янги Конститутсия кучга кирди. Тўқаев 2019-йилда мамлакатнинг биринчи президенти Нурсултон Назарбоев ўрнига давлат раҳбари лавозимини эгаллаган эди. Аввалги Конститутсияга кўра, унинг ваколат муддати 2029-йилгача бўлган ягона муддат билан чекланганди. Янги Конститутсия президент учун бир марталик етти йиллик муддатни сақлаб қолган. Бироқ Конститутсиявий суд қарорига кўра, эски Конститутсия давридаги президентлик муддати ушбу чекловни ҳисоблашда инобатга олинмайди. Суд Президент мурожаатига жавобан берган изоҳида, 1995-йилги Конститутсияга мувофиқ лавозим эгаллаган шахслар 2026-йилги Конститутсия кучга киргач, ушбу лавозимларга қайта сайланиши ёки тайинланиши мумкинлигини билдирган. Шунингдек, янги Конститутсия кучга кирганидан кейинги сайлов ёки тайинлов улар учун биринчи муддат сифатида баҳоланиши таъкидланган. Эслатиб ўтамиз, 2022-йил 20-ноябрь куни бўлиб ўтган муддатидан олдинги президентлик сайловида Тўқаев 81,31 фоиз овоз билан ғалаба қозонган эди. Аввалроқ Қосим-Жомарт Тўқаев Конститутсияга содиқ қолишини ва 2029-йилдан кейин президентлик лавозимида қолмаслигини бир неча бор таъкидлаган. Хусусан, у 2025-йилда берган интервюсида: «2029-йилда истеъфога чиқишимни аллақачон эълон қилганман. Президент Худонинг элчиси эмас, у халқ томонидан сайланган давлат раҳбари. Бизда эса бунинг учун атиги етти йил берилган», — деган эди. Маълумот учун, Тўқаев президентлик фаолиятидан аввал Қозоғистон Бош вазири ва Ташқи ишлар вазири лавозимларида ҳам ишлаган.