Ижтимоий тармоқларда метро вагонларида ҳавонинг иссиқлиги юзасидан шикоят қилган йўловчининг мурожаати кенг тарқалмоқда.

Ушбу ҳолат юзасидан “Тошкент метрополитени” ДУК маъмурияти қуйидагиларни маълум қилди:

“Маълумки сўнгги йилларда метрополитен тизимига бўлган талаб кун саин ортиб бормоқда. Шу боисдан йўловчиларга хизмат кўрсатиш сифатини ошириш мақсадида сўнгги 5 йил давомида босқичма-босқич равишда, 41 та янги ҳаракат таркиби олиб келинди, натижада метро вагон паркининг 50 фоиздан зиёд поездлари янгиланди (Маълумот тариқасида таъкидлаш мумкинки, унгача метро поездлари паркида мавжуд ҳаракат таркиблар сони 36 тани ташкил этган). Ушбу келтирилган янги турдаги поездлар барча замон талаблари асосида ишлаб чиқарилган бўлиб, ёзнинг жазирамасида махсус совитиш ва совуқ кунларда ўзининг иситиш каби кўплаб қулайликларига эга.

Айтиш керакки, ушбу видео мурожаатда таъкидланган ҳаракат таркиби кўп йиллик фойдаланилаётган эски турдаги ҳаракат таркиби бўлиб, ишлаб чиқарувчи томонидан махсус совитиш тизими мавжуд бўлмаган ҳолда ишланган ва бу турдаги қурилма билан жиҳозлаш имконсиз.

Юқорида таъкидланганидек, хизмат кўрсатиш сифатини ошириш мақсадида, янги ҳаракат таркиблари хариди йўлга қўйилган ва жараён давомий тарзда амалга оширилади. Бунинг натижасида босқичма-босқич равишда метро вагон паркидаги поездлар янгиланиши режаланган. Шунингдек, бу ишлар давоми сифатида 2025-2026 йиллар давомида яна янги 14 та тўрт вагонли ҳаракат таркиби харид қилиниб, йўналишларга чиқарилиши мақсад қилинган ва бунинг устида керакли ишлар амалга оширилмоқда”.

• Метро
• Metropoliten
• Тошкент
• issiq