Аввалроқ, Ўзбекистон инсон ҳуқуқлари “Эзгулик” жамияти раиси Абдураҳмон Ташанов ўзининг Facebook саҳифасида Тошкент вилоятидаги “Товоқсой” қамоқхонасида сақланиб келинаётган маҳбус Алишер Якубов қамоқхона ходимларининг мунтазам қийноқлари оқибатида вафот этганлиги ҳақида пост жойлаганини хабар қилгандик.

Тошкент вилояти прокуратураси Ташановнинг ушбу айибловига нисбатан расмий муносабат билдирди.

Қайд этилишича, 7-сонли жазони ижро этиш колониясида жазо ўтаётган маҳкумлар А.Я. ва Т.Д. 2022 йил 19 июнь куни колония бошлиғи томонидан тасдиқланган кун тартибига риоя қилмасдан, ўзларининг яшаш саҳнига кириш ўрнига 2-яшаш саҳнидаги танишлари олдига яширин равишда ўзбошимчалик билан ўтиб, ҳеч кимнинг рухсатисиз, тартибот қоидаларини бузган ҳолда олдиндан адовати бўлган 5-туркумда жазо муддатини ўтаб келаётган маҳкум А.Ю.нинг қадр-қимматини камситувчи сўзлар билан шахсиятига тегиб, қўпол муомалада бўлганлиги ҳолати колония ходимлари томонидан аниқланиб, А.Я. ва Т.Д. лар интизомий жазога тортилган.

Шундан сўнг, бундан норози бўлган маҳкумлар А.Я. ва Т.Д. бинонинг иккинчи қаватидан колониянинг тақиқланган ва яшаш саҳни томонга қараб ўзларини улоқтирган. Маҳкумлар А.Я. ва Т.O.га биринчи тез тиббий ёрдам кўрсатилган.

“Ҳозирги кунда уларнинг соғлиги қониқарли ҳолатда.

Тошкент махсус прокуратураси томонидан терговга қадар текширув ҳаракатлари ўтказилди ва натижасига кўра, ушбу ҳолатда жиноят аломатлари аниқланмаганлиги сабабли, жиноят иши қўзғатиш рад этилди”,– дейилади прокуратура муносабатида.

• Abdurahmon Tashanov
• Toshkent viloyati prokuraturasi
• rasmiy munosabat