Самарқанд вилояти Тайлоқ тумани ҳокимлиги “Тойлоқтумангаз” газ таъминоти корхонасида юз берган бахтсиз ҳодисадан 7 кун ўтиб “тилга кирди”.

Ҳокимлик ўз муносабатида жорий йилнинг 18 март куни соат 15:00ларда “Тойлоқтумангаз” газ таъминоти бўлими электрон газ ҳисоблагич муҳандисининг хизмат хонасида портлаш содир бўлгани, натижада 2 нафар ходим ҳамда 2 нафар мурожаат билан келган фуқаролар тан жароҳати олганини тасдиқлаб, ҳодисага кондиционернинг портлаши сабаб бўлганини маълум қилган. 

“Дастлабки маълумотларга кўра мазкур хонада ўрнатилган ва ишлаб турган “Artel” русумли кондиционер чақнаши натижасида хонада портлаш содир бўлганлиги аниқланган. Воқеа жойидан носоз ҳолатда келган бир дона кондиционер ашёвий далил сифатида олинган”, – дейилади ҳокимлик муносабатида.

Шунингдек, тан жароҳати олган фуқароларнинг аҳволи яхши эканлиги ҳам маълум қилинган.  

Ҳокимлик, шунингдек, мазкур ҳолат бўйича “асослантирилмаган хабарлар тарқалаётгани” ҳақида огоҳлантириб, фуқаролардан аниқ ва ишончли манбалардан ахборот олишларини сўраган.

Шу ўринда айрим саволлар пайдо бўлади: 4 кишини жароҳатлаган бахтсиз ҳодисага нега ўз вақтида (токи интернет нашрларида эълон қилинмагунича) расмий муносабат билдирилмади?

Xabardor.uz таҳририятига келиб тушган мурожаатда хонада газ ҳиди сезилгани ҳақида гап борган эди. Шунда бахтсиз ҳодисага кондиционернинг портлаши сабаб бўлганми ёки ишлаб турган кондиционер хонада тўпланган газ ҳисобига портлаганми?

Нега портлаш бўлган хона тезда таъмирлаб қўйилди? Ёки нега корхона мутасаддилари жабрланганлардан ҳеч қаерга мурожаат қилмасликларини сўради?..

Ҳокимлик ҳодиса хронологиясини келтириш билан биргаликда юқоридаги саволларга ҳам жавоб берса, яхши бўлар эди...   

• Самарқанд
• Тайлоқ