Термизда Президент Шавкат Мирзиёев раислигида Сурхондарёни ижтимоий-иқтисодий ривожлантириш юзасидан йиғилишида вилоятнинг транзит ва туризм салоҳиятини ишга солиш масалалари ҳақида гапирилди.

Таъкидланишича, вилоятга қўшни давлатларда 5 миллиард долларлик катта бозор бўлса-да, уларга экспортимиз 200 миллион долларга етмайди.

Ҳозирда 75 миллион доллар сармоя эвазига “Термиз халқаро савдо маркази” қурилмоқда. Марказга “Термиз” божхона пости кўчирилади, “ягона дарча”, нотариал ва банк хизматлари йўлга қўйилади.

Шунингдек, Сариосиёдаги “Ўзбек-Тожик чегара пости” ёнида 6 гектар бўш ерда “Транспорт логистика маркази”ни барпо этиш, Бандихондаги “Танги-муш” стансиясида экспорт учун юк ортиш-тушириш хизматлари йўлга қўйилади.

Транзит салоҳияти юқори Термиз шаҳри, Жарқўрғон, Сариосиё ва Узундаги магистраль йўл четида логистика-сервис марказлари очилади, Жарқўрғон, Олтинсой ва Деновни боғловчи 111 километр йўлни таъмирлашга хусусий шерик жалб қилинади.

• Президент
• Сурхондарё
• Ялпи Мажлис