АҚШ Президенти Доналд Трамп Украинага Patriot ҳаво мудофаа тизими учун тутиб қолувчи ракеталарни ишлаб чиқариш лицензияси берилиши мумкинлигини маълум қилди. Бу ҳақда у Анқарада ўтаётган НАТО саммити доирасида Украина Президенти Владимир Зеленский билан учрашувда айтди. Трампнинг таъкидлашича, АҚШ Украинага Patriot ракеталарини маҳаллий ишлаб чиқариш технологиясини тақдим этиши мумкин.

У буни ҳужум қуролларидан кўра муҳимроқ деб баҳолаб, Киев энди қурол етказиб бериш бўйича шикоят қилмаслигини ҳазиломуз тарзда қайд этди. Зеленский эса АҚШ раҳбари урушни тугатиш йўлида муҳим роль ўйнашига ишонишини билдириб, Вашингтоннинг қўллаб-қувватловини юқори баҳолади. Трампнинг айтишича, Украинага айрим тайёр Patriot ракеталари яқин вақтда етказиб берилиши мумкин. Шу билан бирга, янги ракеталарни Германия ёки бошқа Европа давлатларида ишлаб чиқариш варианти ҳам кўриб чиқилмоқда.

Маълумот учун, Patriot тизими Россиянинг баллистик ракеталарини тўхтата оладиган энг самарали ҳаво мудофаа тизимларидан бири ҳисобланади. Унда қўлланиладиган ракеталарнинг асосий ишлаб чиқарувчиси Lockheed Martin, тизимнинг ўзи эса Raytheon томонидан ишлаб чиқилган.