Хоразм вилоятида транспорт инфратузилмасини тубдан яхшилаш мақсадида Урганч—Хива йўналишида янги пулли автомобиль йўли қурилиши режалаштирилмоқда. Бу ҳақда Хива ҳокимлиги матбуот хизмати хабар берди.

Маълум қилинишича, лойиҳа доирасида умумий узунлиги 32 километр бўлган янги автомобиль йўли барпо этилади. Ушбу йўл мавжуд йўналишларга муқобил бўлиб, транспорт қатновини сезиларли даражада енгиллаштиради, сафар вақтини қисқартиради ва ҳаракат хавфсизлигини оширади. Йўл тўлиқ фойдаланишга топширилгач, ундан фойдаланиш пулли асосда амалга оширилади.

Янги автомобиль йўли ишга туширилиши натижасида Урганч ва Хива шаҳарлари ўртасидаги қатнов сифати яхшиланади, юк ва йўловчи ташиш жараёнлари тезлашади ҳамда ҳудуднинг инвестицион ва туристик жозибадорлиги ошади.

Маълумотларга кўра, янги трасса Урганч шаҳри ҳудудидан бошланиб, айланма йўналиш орқали Хива шаҳрига туташади. Пулли асосда фойдаланиладиган ушбу йўл мавжуд автомобиль йўлларидаги юкламани камайтириш, тирбандликларни бартараф этиш ва транзит транспорт воситаларини аҳоли зич яшайдиган ҳудудлардан чиқаришга хизмат қилади.

Мутахассислар фикрича, пулли йўл сифатида қурилиши трассанинг доимий сақланиши, таъмирланиши ва хизмат кўрсатиш сифати юқори бўлишини таъминлайди.

• Ҳокимлик
• Хоразм
• Йўл қурилиш
• хабар