Бугун Осиё Паралимпия қўмитаси висе-президенти – Ўзбекистон Миллий паралимпия қўмитаси раиси Мухторхон Ташходжаев IBSA кўзи ожизлар дзюдо федерасияси спорт директори Янош Тардос билан учрашди.

Тошкентда ўтаётган дзюдо бўйича жаҳон чемпионати давомида кўплаб нуфузли спорт ташкилотлари раҳбарлари қатори IBSA кўзи ожизлар дзюдо федерасияси спорт директори Янош Тардос ҳам пойтахтимизга ташриф буюрди.

Бугун Осиё Паралимпия қўмитаси висе-президенти – Ўзбекистон Миллий паралимпия қўмитаси раиси Мухторхон Ташходжаев ИБСА кўзи ожизлар дзюдо федерасияси спорт директори Янош Тардос билан учрашди. Шунингдек, учрашувда Ўзбекистон дзюдо федерасияси раиси Азиз Камилов ҳам иштирок этди.

Самимий кечган суҳбат давомида томонлар ўзаро ҳамкорлик масалаларини яқиндан муҳокама қилишди.

Жумладан, Мухторхон Ташходжаев IBSA томонидан пара дзюдо бўйича кўплаб ижобий ўзгаришлар амалга оширилаётганини таъкидлаб, сўнгги пайтларда Ўзбекистонда ҳам кўзи ожиз инсонлар ўртасида пара дзюдо спорт турига қизиқувчилар сони тобора ортиб бораётганини билдирди. Бундан ташқари, юртимизда халқаро тоифадаги классификаторларга эҳтиёж юқори экани боис, бу борада IBSA билан ҳамкорликда ўзбекистонлик мутахассисларни ҳам халқаро тоифадаги классификатор сифатида тайёрлаш бўйича таклиф билдирди. Бундан ташқари, Ўзбекистонда пара дзюдо бўйича нуфузли халқаро мусобақаларни ўтказиш масаласида ҳам фикр алмашилди.

Ўз навбатида Янош Тардос ҳам ўзбекистонлик пара дзюдочилар дунёда кучлилар қаторида эътироф этилишини айтиб, ушбу ютуқлар мамлакатимизда яратилган улкан имкониятлар натижаси эканини билдирди. У ИБСА ҳамда Ўзбекистон Миллий паралимпия қўмитаси ўртасидаги ҳамкорликни янги босқичга олиб чиқишга ва ҳар томонлама қўллаб-қувватлашга тайёрлигини маълум қилди.

Шунингдек, 2023 йил Халқаро парадзюдо бўйича мусобақалар тақвимидан ўрин олган нуфузли турнирлардан бири юртимизда ўтказилиши кутилмоқда….

• Дзюдо
• Параспорт