Президент Шавкат Мирзиёев иқтидорли бошқарувчилар ва янги авлод раҳбарларини саралаш ҳамда 2030 йилгача миллий кадрлар захирасини шакллантириш бўйича янги тизим тақдимоти билан танишди. Янги тизимга кўра, раҳбар кадрлар эндиликда анъанавий ҳужжатлар эмас, балки билим, тажриба, лидерлик салоҳияти ва стратегик фикрлашни қамраб олувчи портфолио асосида баҳоланади. Ҳар икки йилда 500 нафар истиқболли бошқарувчи сараланиб, 2030 йилгача 1,5 минг нафар юқори салоҳиятли раҳбардан иборат миллий кадрлар захирасини шакллантириш режалаштирилган.

Шунингдек, аграр соҳа, соғлиқни сақлаш, тадбиркорлик, суд-ҳуқуқ, таълим, ахборот технологиялари ва сунъий интеллект йўналишларини қамраб олувчи «ТОП-100» очиқ танловини йўлга қўйиш таклиф этилди. Бундан ташқари, 2026 йил 1-октабрдан career.edu.uz платформасида «Хориждаги талабалар» модули ишга туширилади. Ушбу тизим орқали хорижда таҳсил олаётган ёшлар давлат идоралари ва хусусий корхоналарга бириктирилиб, амалиёт ўташи, иш берувчилар билан ҳамкорлиги ҳамда кейинчалик ишга жойлашиши қўллаб-қувватланади. Тақдимотда «Эл-юрт умиди» жамғармаси фаолиятини янада такомиллаштириш, иқтидорли ёшларнинг хориждаги таълими, стартаплари ва илмий тадқиқотларини грантлар орқали қўллаб-қувватлаш масалалари ҳам муҳокама қилинди.