Ўзбекистонда ҳали тўлиқ қуриб битказилмаган ва фойдаланишга расман топширилмаган кўп қаватли уйларга фуқароларни кўчириб киритган масъул шахсларни жиноий жавобгарликка тортиш таклиф этилмоқда. Бу масала Олий Мажлис Қонунчилик палатасининг навбатдаги мажлисида муҳокама қилинди. Қайд этилишича, айрим қурилиш объектларида бино ҳали тўлиқ битказилмаган ва фойдаланишга қабул қилинмаган бўлса-да, фуқаролар хонадонларга кўчириб киритилаётгани кузатилмоқда.

Мутасаддиларга кўра, бундай ҳолатлар аҳоли ҳаёти ва соғлиғи учун жиддий хавф туғдириши мумкин. Шу муносабат билан қонунчиликка ўзгартириш киритилиб, фойдаланишга расман топширилмаган кўп қаватли уйларга фуқароларни кўчириб киритишга йўл қўйган масъул ва мансабдор шахслар учун тўғридан-тўғри жиноий жавобгарлик белгилаш таклиф қилинмоқда. Бундан ташқари, Шаҳарсозлик кодексига буюртмачи ва пудратчилар зиммасига фойдаланишга қабул қилинмаган кўп қаватли уйларга аҳолини кўчирмаслик мажбуриятини юкловчи нормаларни киритиш ҳам режалаштирилган.