Qozog‘iston Prezidenti Qosim-Jomart Toqayev Mang‘istau viloyatidagi namoyishchilarni “mas’uliyatga va muloqotga tayyor bo‘lishga” chaqirdi.

Mang‘istau viloyatining Janaozen, Aqtau va shaharlari aholisi 2022-yil 2-yanvardan boshlab suyultirilgan gaz narxi oshishiga qarshi norozilik bildirishni boshlashgan. Ular bir litr gaz narxini 120 tengedan 50 tengega tushirishni talab qilayotganligi qayd etilgan.

Shuningdek, joriy yil 4-yanvar kuni Aqtauda Intimak maydonida 500 ga yaqin odam to‘plangan. Namoyishchilar uchun markaziy maydonda ulkan o‘tov tikilgan va uning ichida issiq, choy, non, somsa bo‘g‘irsoq va boshqa taomlar tarqatish tashkil qilingan. Shuningdek, tunda ayollar va qariyalarga adyollar tarqatilgan.

“Aqtauda hukumat komissiyasi ish boshladi, uning tarkibiga prezident ma’muriyati xodimlari kirgan. Respublika tezkor shtabi doimiy asosda ish olib bormoqda. Komissiyaga mamlakatimizdagi barqarorlik manfaatlaridan kelib chiqqan holda yuzaga kelgan muammoning maqbul yechimini topish vazifasi topshirildi. Huquqni muhofaza qiluvchi organlarga jamoat tartibi buzilmasligini ta’minlash bo‘yicha ko‘rsatmalar berildi. Namoyishchilar mas’uliyat va muloqotga tayyorligini ko‘rsatishi kerak”, – deb yozgan Qosim-Jomart Toqayev o‘z sahifasida.

Xabarda keltirilishicha, hukumat suyultirilgan gaz narxini tartibga solish bo‘yicha komissiya tuzib, narx allaqachon 120 tengedan 85-90 tengega tushirilganini ma’lum qilgan. Shuningdek, raqobatni himoya qilish va rivojlantirish agentligi Mang‘istau viloyatidagi ehtimoliy narx kelishuvi bo‘yicha yoqilg‘i quyish shoxobchalari egalariga nisbatan tekshiruv o‘tkazishni boshlagan.

Tadbirkorlar tomonidan narxlarni asossiz oshirib yuborish holatlari aniqlangan taqdirda Raqobatni himoya qilish agentligi tomonidan ma’muriy choralar ko‘riladi, deyiladi xabarda.

• Gaz
• Qozog‘iston