Ijtimoiy tarmoqlarda Toshkent shahar Olmazor tumani hududida qurilayotgan O‘zbekistondagi Islom sivilizatsiyasi markaziga tutash xonadonlarning biri buzib tashlangani haqida xabarlar tarqaldi.

Tarqalgan videotasvirda aytilishicha, xonadonlarning biriga tungi vaqtda Olmazor tuman hokimi o‘rinbosari Abdurasul ismli shaxs (videotasvirdagi gapga ishonilsa, bu Kuno‘z nashri bilan muammoli vaziyatga tushib 2019-yilning 27-sentyabrida tuman hokimi o‘rinbosari lavozimidan ketgan, ammo 2020-yilning noyabrida yana “post”ga qaytgan Abdurasul Vahobov bo‘lishi mumkin, -tahr.) 15 nafar maskali harbiylar bilan kelib, xonadon egalarini majburan uydan olib chiqqan va uylarini buzishgan.

Xabardor.uz so‘rovi bilan Bosh prokuraturaning bergan maʼlumotiga ko‘ra, Olmazor tuman hokimligining 5-yanvar kungi daʼvo arizasiga asosan Fuqarolik ishlari bo‘yicha Toshkent shahar Shayxontohur tumanlararo sudi 2022-yil 17-fevralda hokimlik foydasiga sirtdan qaror qabul qilgan, yaʼni hokimlik daʼvosi qanoatlantirilgan.

Unga ko‘ra, javobgar Sh.A., M.A. va 3 nafar farzandlari bilan Olmazor tumani Yog‘du ko‘chasida joylashgan yangi qurilgan 6-sonli ko‘p qavatli uyning 2 ta xonadoniga ko‘chirilishlari belgilangan.

Shuningdek, ushbu hovlining mulkdori bo‘lgan yana bir fuqaro – Sh.A.ga Shayxontohur tumani Ko‘kcha dahasidan 2 xonali yangi xonadon ajratilib, mazkur oilaga jami 3 ta xonadon berilgan.

Eslatib o‘tamiz, joriy yil 1-fevraldagi Oliy Majlis Qonunchilik palatasi yalpi majlisida deputatlar “Yer uchastkalarini kompensatsiya evaziga jamoat ehtiyojlari uchun olib qo‘yish tartib-taomillari to‘g‘risida”gi  yangi qonunni qabul qilgan va maʼqullash uchun Senatga yuborgan edi.

Mazkur hujjatga ko‘ra, kelgusida fuqarolarning mulk huquqini buzayotgan mantiqsiz qonunosti hujjatlar bekor qilinishi, hokimliklarning fuqaroga tegishli yerlarni birovlarga berib yuborishi mumkin bo‘lgan barcha “darchalar” yopilishi kerak edi.

Shuningdek, maʼqullanishi kutilgan yangi qonunga ko‘ra “snos”ga tushayotgan hudud egalari bilan ochiq muhokama tashabbuskor tomonidan tashkil etilishi va ochiq muhokama jarayonining majburiy tartibda audio va video yozuvi taʼminlanishi belgilanayotgan edi. Ochiq muhokamada esa ommaviy axborot vositalari ishtirokini tashkil etish ham nazarda tutilgan edi.

Ammo mazkur qonun nomaʼlum sabablarga ko‘ra Senat tomonidan qaytarilgan.

“To‘g‘ri qonunda baʼzi kamchiliklar bo‘lishi mumkin, biroq bu bilan butun boshli qonunni qaytarish noto‘g‘ri, deb o‘ylaymiz. Hozircha asosli eʼtiroz ham ko‘rmadik”, – deb o‘z munosabatini bildirgan edi deputat Rasul Kusherbayev. 

Maʼlumot uchun, O‘zbekiston “Hukumat sud qarorisiz va adolatli tovon pulisiz mulkni musodara qilmaslik” reytingida 139 ta davlat ichida 138-o‘rinda turadi.

Shuningdek, 2022-yilda Iqtisodiy erkinlik reytingining “Mulk huquqi” indikatorida O‘zbekistonning o‘rni uchun 73 pog‘onaga pasayib, 180 mamlakat ichida 148-o‘ringa tushgan (2021-yilda 75-o‘rin).

• Bosh prokuratura
• Murojaat
• Snos
• Sud
• Toshkent