Issiq havoda qanday rangdagi kiyim kiyish kerak?

Yozning jazirama kunlarida to‘g‘ri kiyim tanlash nafaqat qulaylik, balki salomatlik uchun ham muhim. Mutaxassislar fikricha, mos kiyim tanlash tanani samaraliroq sovutishga yordam beradi va hatto konditsionerdan foydalanish ehtiyojini ham kamaytirishi mumkin.

Kiyim rangi emas, bichimi muhimroq

Ko‘pchilik oq kiyim quyosh nurlarini qaytargani uchun eng yaxshi tanlov deb hisoblaydi. Biroq tadqiqotlar shuni ko‘rsatadiki, kiyimning kengligi uning rangidan ham muhimroq.

1980-yilda sahroda yashovchi beduinlar ishtirokida o‘tkazilgan tadqiqot natijalariga ko‘ra, keng qora va keng oq kiyimlar issiqlik ta’siri jihatidan deyarli bir xil bo‘lgan. Sababi, keng kiyim mato bilan teri orasida havo aylanishini ta’minlab, tanani tabiiy ravishda sovutadi.

Shu bois mutaxassislar:

keng bichimli kiyimlarni tanlashni tavsiya qiladi;

agar kiyim tanaga yopishib turadigan bo‘lsa, oq yoki och ranglar afzal hisoblanadi.

Qaysi mato yaxshiroq?

Issiq havoda eng maqbul tanlov — yengil va havo o‘tkazuvchan matolar.

Paxta va zig‘ir yaxshi nafas oladi, ammo namlikni uzoq ushlab turadi va sekin quriydi.

Neylon va poliester terni tez chiqaradi hamda tez quriydi, biroq noxush hidni ko‘proq saqlashi mumkin.

Bambuk tolali matolar ham issiq havoda qulay variantlardan biri sifatida e’tirof etilgan.

Yangi texnologiyalar

Olimlar issiqlikni samaraliroq chiqaradigan zamonaviy matolar ustida ishlamoqda. Jumladan:

quyosh nurini qaytaruvchi va infraqizil nurlanishni o‘tkazuvchi tolalar;

haroratga qarab tuzilishi o‘zgaradigan “aqlli” matolar;

tana haroratini 2°C gacha pasaytirishi mumkin bo‘lgan sovutuvchi elementli kiyimlar sinovdan o‘tkazilmoqda.

Ho‘l kiyim ham yordam beradi

Mutaxassislarning ta’kidlashicha, biroz namlangan kiyim suv bug‘lanishi hisobiga tanadagi issiqlikni o‘ziga tortadi va organizmni samaraliroq sovutadi.

Xulosa: jazirama kunlarda och rangli, keng bichimli va havo o‘tkazuvchan matodan tikilgan kiyimlar eng yaxshi tanlov hisoblanadi. Zarurat tug‘ilganda kiyimni biroz namlash ham tana haroratini pasaytirishga yordam beradi.