Afg‘onistonning Nimro‘z viloyati sahrosida Eronga noqonuniy yo‘llar bilan o‘tmoqchi bo‘lgan 19 nafar yosh yigitdan besh nafarining jasadi topildi. Yana 14 nafarining taqdiri esa noma’lumligicha qolmoqda. Bu haqda TOLOnews xabar berdi.

Xavfsizlik rasmiylarining ma’lum qilishicha, ushbu guruh Hilmand va Nimro‘z viloyatlari sahrolari orqali Eronga yashirincha o‘tishga uringan. Ularning besh nafari jazirama issiq va suvsizlik oqibatida vafot etgan.

Afg‘onistonning janubi-g‘arbida joylashgan Nimro‘z viloyati Pokiston va Eronga noqonuniy o‘tishga urinadigan afg‘onlar uchun asosiy tranzit yo‘nalishlaridan biri hisoblanadi. “Tolibon” ushbu yo‘nalish orqali noqonuniy yurishni taqiqlagan.

Shunga qaramay, ayrim yoshlar odam savdogarlari yordamida Eronga yashirincha o‘tishda davom etmoqda.

Avvalroq Kobul aholisi elektr uzilishidan shikoyat qilayotgani va tok faqatgina “Tolibon”ga aloqador oilalarda borligi haqida xabar berilgandi.