Alkogolli ichimliklarni reklama qilgan bloger javobgarlikka tortildi

Raqobat qo‘mitasi alkogolli ichimliklarni reklama qilgan blogerga nisbatan ma’muriy chora ko‘rib, ish bo‘yicha hujjatlarni sudga yubordi.

Qo‘mita ijtimoiy tarmoqlarda joylashtirilayotgan reklama materiallarining qonunchilik talablariga muvofiqligini o‘rganish davomida bloger N. Sobirovga tegishli sahifada alkogolli ichimlik reklamasi joylashtirilganini aniqladi.

Ma’lumotlarga ko‘ra, bloger o‘z sahifasida qonunchilik bilan reklama qilinishi taqiqlangan mahsulotlarni targ‘ib qilgan.

O‘zbekiston Respublikasining “Reklama to‘g‘risida”gi Qonunining 38-moddasiga muvofiq, har qanday quvvatdagi alkogolli ichimliklarni reklama qilish taqiqlanadi.

Qonunchilikda faqat pivo, tabiiy va ko‘piklanadigan vinolarni belgilangan vaqt, shakl hamda auditoriyaga oid cheklovlarga rioya qilingan holda reklama qilishga ruxsat berilgan.

Shu bilan birga, ijtimoiy tarmoqlarda alkogolli ichimliklar reklamasini har qanday shaklda tarqatish taqiqlanadi.

Yuqoridagilardan kelib chiqib, Raqobat qo‘mitasi reklama qilinishi qonunchilik bilan taqiqlangan mahsulotni targ‘ib qilganligi uchun bloger N. Sobirovni belgilangan tartibda ma’muriy javobgarlikka tortib, tegishli hujjatlarni sudga yubordi.